Manawarūtia ai ngā ahurea o te ao mō ngā rautau maha e te maneatanga me ngā āhuatanga motuhake o te koura me te hiriwa - hei konganuku kahurangi, rangatira, tūmatarau hoki. Kei te whakakitea e Precious Metals tata ki te waru tekau ngā taonga koura me te hiriwa mai i ngā kohinga a Te Papa, mai i ngā tau 1860 ki nāianei.
Hei tīmatanga ka kitea he tauira o aua konganuku horomata. Kei te whakaaturia he tikanga waihanga i aua konganuku mā tētahi kōwhiringa o ngā pāraha o mua, tata ōrite ki ērā e whakamahia ana e ngā kaihanga o nāianei.
Kei te whakaatu mai ‘He rautau auaha’ i ētahi taonga pakupaku mō runga tēpu - āta rapuhia ai e ngā kaikohi ināianei - i te taha o ētahi atu taonga nō te rautau tekau mā iwa. He mea rerekē ki Aotearoa te mea rarahi anake o te whakakitenga, te ipu rōhi Russell, ā, i hangaia i Sheffield, Ingarangi mā te kaitōrangapū, kaipupuriwhenua hoki, mā Tā William Russell Russell.
Ka kitea hoki he tauira o te tikanga anuanu o te wā Wikitōria o te whakamahi wāhanga tinana kararehe i roto i ngā taonga mō runga tēpu, i roto hoki i ngā rei. Ko tētahi o ngā mea rerekē atu ko tētahi tiaka i hangaia mai i te hēki emu. Ko tētahi atu mea whakapōuri ko tētahi pine koura i hangia ki te ngutu huia, tēnā peā i te wā tonu i ngaro ai taua momo manu.
Ko te ‘mahi paraoa’ o te nuinga o ngā kaihanga rei i te huringa o te rautau, he hanga taonga whakamaumahara. Ka whakakitea e Precious Metals te whānuitanga o ēnei momo taonga, tae atu ki tētahi pouraka hiriwa me tētahi tātaitai kaihoko wūru.
I tua atu i ērā taonga tawhito atu, kohi ai Te Papa i ētahi taonga nā ngā kaihanga rei o nāianei. He tauira pai ngā mea nei o ngā ia hou i tēnei whenua mai i te takiwā o 1960 - hei tauira, te whakauru mea rokohanga, ngā momo hou, rerekē hoki o te whakamahi rawa konganuku.
Ko ētahi o ngā kaihanga i tēnei wāhanga i heke mai ki tēnei whenua me te whakamahi tonu i ngā tikanga o tāwāhi i waea kē ai rātou. Whai wāhi ai rātou me ngā kaitoi i whānau ki Aotearoa ki ngā take o te wāhi noho, o te ahurea me ngā mahi tōrangapū mā ā rātou mahi toi, me te whakaatu i tō rātou aronga tupu haere o te tuakiri o Aotearoa, o te Moana-nui-a-Kiwa anō hoki.