Mō Tatou - Te Whakaaturanga a Ngāi Tahu Whānui
Mō tātou, ā, mō kā uri, ā muri ake nei
For us and our children after us
Nā mātou, nā Ngāi Tahu Whānui, te iwi o te Waipounamu, te pōwhiri ki a koutou kia haere mai ki te whakanuitanga o ō mātou wā o mua, me ērā o nāianei, ō mātou uaratanga, me ō mātou tirohanga whakamua, kei tēnei te whakaaturanga-ā-iwi tuarima kei Te Papa nei.
Ko tēnei ingoa Ngāi Tahu, ko ngā uri a tō mātou tupuna whakaū, a Tahu Pōtiki. Tekau whakatipuranga pea ki mua ka heke mai ana aitanga mai i Te Ika-a-Māui ki te Waipounamu. Nā roto i ngā moe haere, me ngā raupatu a ngā hekenga tuatahi, ka hanumi ki ngā iwi o Waitaha me Kāti Māmoe, ka puta ko Ngāi Tahu Whānui o nāianei.
Mau tūturu ki te whenua, kei te ora, kei te haere whakamua a Ngāi Tahu, mai i te tata ngaro ki te pikitanga ake o tōna mana, me tōna tū pakari. E whā ngā tohu tikanga ahurea kei te katohia mai i tā mātou pepeha, ‘Mō tātou, ā mō kā uri ā muri ake nei’, hei kaupapa whakarite mō tēnei whakaaturanga hei whakaahua ki te ao hou ō mātou wā ō mua, me ērā o nāianei.
• Toitū te iwi Culture
• Toitū te rangatiratanga Tenacity
• Toitū te ao tūroa Sustainability
• Toitū te pae tawhiti Innovation
Mai i ā mātou kōrero mō te orokohangatanga o te ao ki ā mātou taonga whakahirahira, ki ā mātou whakaahuatanga ki te ao whānui, mā Mō Tātou e whakanui te ahurea ahurei, neke whakamua hoki, o Ngāi Tahu, te iwi o Te Waipounamu.